427 metrow dołhi kanal z čisłom 6 zwjazuje Parcowski jězor w zapadźe z Nowołučanski jězorom we wuchodźe. Swojeho nimale 50 metrow dołheho přepława dla připrawa hoberska skutkuje. Wona je trěbna, dokelž leži Nowołučanski jězor tři metry wyše hač Parcowski jězor. Maritimny twar krónuje impozantny móst, přez kotryž statna dróha 234 z Wojerec do Bjezdowow wjedźe.

Kanale nimaja jenož turistiski wuznam. Słuža tež regulowanju stawa wody w jednotliwych nowych jězorach kaž tež wuměnje wody mjez nimi. We łužiskej jězorinje ma něhdy raz 13 kanalow być. Kanal 6 zwjazuje jadro rjećaza jězorow z wuchodnym dźělom jězoriny. W přichodźe budu tu pasažěrske łódźe jězdźić.

Mjeztym zo so Parcowski jězor jako nowy cil za dowolnikarjow wuwiwa, su dźěle Nowołučanskeho jězora za přirodoškit předwidźane. Jězor słuša k jadrowej kónčinje přirodoškitneho wulkoprojekta „Łužiska jězorina“, kotrehož podpěraćeljo so hižo wot lěta 2000 w regionje angažuja. Zaměr je, zo zachowa so pohórnistwowa krajina, kotraž po móžnosći mnohim družinam nowu domiznu skića. Wosebje zwisk, kotryž kraj a woda tu tworitej, skića bohate móžnosće.

Cyle blisko kanala 6 nastawa prózdninske sydlišćo. Z kanala maš rjany wuhlad na Parcowski a Nowołučanski jězor.