Wočerstwjenje a aktiwny dowol stej w Lejnom hłownej hesle, z kotrymiž su sportowske aktiwity na wodźe a na kraju zwjazane.

Nimo štyrjoch nadregionalnych kolesowanskich šćežkow wabi tu asfaltowany kołopuć, kotryž jězor wobdawa. Na wjacorych wuhladnišćach móžeš pozastać a powotpočnyć.

Módre kóstki při puću Windspitze su swědki Mjezynarodneje twarskeje wustajeńcy (IBA), kotraž je wot lěta 2000 do 2010 bytostne slědy we łužiskej jězorinje zawostajiła. Ideje, kaž płuwace domy w Lejnom, su wuslědk z IBA zwisowacych iniciatiwow.

W šuli za wodosport „SurfRenner“ wuchodnje jězora móžeš wšelaki wodosport nawuknyć a sej nastroje za wodosport wupožčić.

Wosebje w horcym lěću wabi přibrjóh z drobnuškim pěskom wšitkich słónca lačnych a wodu lubowacych.

W zapadźe skića wodosportowy centrum čołmikowarjam a płachtakowarjam dobre móžnosće za jich sportowu zaběru.

Ze swojimi płachtakowanskimi aktiwitami je „1. wodosportowe towarstwo we łužiskej jězorinje“ nadregionalny wuznam nabyło. Zaměr za přichod je, zo so tule třeći olympiski centrum za přihot na paralympics-hry w Němskej etablěruje.

W bliskej šuli za wodoski móžeš tutu družinu sporta nawuknyć abo so tutomu hobbyjej wěnować.

A nic naposledk tworja „Swětłownja“, hosćenc „Podkopkowa lampa“ a „Ulfowa bróžeń“ přez cyłe lěto jara doporučujomny gastronomiski třiróžk. Nimo toho dóstawaš w lětnjej sezonje blisko přibróha zakuski abo kulinariske dobroty w „Grill & Chill - Donuts“ pod swětłownju.